Ӱмаште теле тылзын 23-шо кечынже «Сулий» ушем «Школ — Пермь кундемысе илыше марий-влакын тӱвыра, йылме, йӱла поянлыкыштым арален кодымо шотышто рӱдер» тема дене «йыргешке ӱстелым» эртарен колташ полшен.
Пу гыч ыштыме тиде тошто оралтыште пашам ыштымым чарыме нерген йодыш кызытат пеш пӱсӧ. Верысе марий-влак, тӱрлӧ йӧным кучылтын, тиде йодышлан чын вашмутым муаш тыршат.
Мероприятийыш Пермь кундемысе губернаторын да Суксо районын администрацийыштын еҥышт, шанчызе, школ вуйлатыше-влак, калыктӱвыра компонент дене пашам ыштыше туныктышо-шамыч да татар да руш калыкле (национальный) рӱдер-влакын представительышт ушненыт.
Эҥермучаш да пошкудо Кызганде школ-влакын вуйлатышышт ден туныктышыштын докладышт пеш келге да пӱсӧ лийыныт. «Кок йылме дене кутырышо йоча-влакым шочмо калыкын йылме поянлыкшылан эҥертен куштымашын кӱлешлыкше моткоч кугу. Тыгак школ — ялыште илыше калыкын тӱвыра рӱдерже. Тудо калыкле ойыртемым арален кодаш полша», — умылтараш тыршеныт нуно погынышо-шамычлан. Тиде «йыргешке ӱстел» йыр мутланымаш могай-гынат шӱкалтышым ышта манын ӱшаныме шуэш.
Эше ик куандарыше увер: Пермь кундемыште илыше калык-влак коклаште кылым вияҥдыме да пеҥгыдемдыме шотышто крайысе лӱмын ыштыме программе почеш Кызганде ден Эҥермучаш ялласе кнагагудо ден школлашке Марий Элысе книга савыктыш гыч 24 тӱжем теҥгеаш сылнымут ден шанче-методик литературым налме. Тыгак Эҥермучаш школыш эше 18 тӱжем теҥгелан тунемме кнагалам кондымо, воза «Марий Эл» газет.
«Йыргешке ӱстелын» радамже (рушла) >>
Эҥермучаш школ марий калыкын поянлыкшым арала (рушла) >>
Эҥермучаш школын миссийже (рушла) >>
Сулий 